Basekavara va Alfred Dreyfus (yunkexa)

Ewava tir popafa eke al vanpir Izva. Tanoy afigasuteks va bifa krulder voxen yona vayasikafa oxila to kan telu losposafu taneabu ke Yunkeyen Loplekuks ke Petit Journal jonksudayanu koe data neva va bata folvafa vula ke 5^-e ke taneaksat ke 1895 al wid : i kan basekavara va Alfred Dreyfus koe kusk ke Sayakafo Bemaxo. Ebeltakorafe ayikyeme rabetafe is zwafe, deswayambe gu intaf mepteem isu fumeem titeon daykes, triton ranyer, kabdue ctakikye dem tantazukotany is ton yinaxot koe suka, moempase va abalt ke tiyis redakik moe bade.

Bat gretcaks va sizunta ke vulaca dir ugale deltan ugal me jupayar da afigasutesik va lan lecapaf verast ba empara va imiz rodevannarir. « Tere yantaf mam va kotote cin ve skotcotesiyir, griporayan dug su zo ariseyer azen empaks mo lume al zo kabuyud », ugaldusik ke Petit Journal tcokeyes va sanegafa estera va « tel krizaf zatkik » vilder.

Jotaf kaburervoliaf francaf redakik Alfred Dreyfus gu dolera pu volnik va azed ke warzafi 75^-e buli zo buntur. Kire gu nubasuteyena puza faluyuna kou pemaxo ke Germana mbi yoftecker. Birgafi vargi divnedini pu Gejapirdot va bat Yud fayik kaikanzar ise va inafa gugafamuca iltrakur. Lanzayan gu rezgalera ko ralma, in va bata plukesa fipta levgar abdida ko Diable ewala koe Guyana fu mallapir.

« Va Franca blir ‼ Va volgunik basekavac ! », diviegar.

« Tel zatkik va guga wan lamtayar », sutelasik azon munestes va « moxinafa gozara » lente emaveyen sayakik sebuyur.

« Viele in kabdu polku artlaniyir pune tari soe kevgini sume Fontenoy viga va kovudese xonukie iegayar. Bam gildayav eke tel zatkik moe viga vansana gan tari proyon vode me zo basekavayar : sayakaf milk co zo divlamayar numen tel gunik co di zo lipeyer. »

Taneon kevdreyfusevafa, Petit Journal fela remi san-toloya tegulana tanda ke tiskira ke Tela Arienta mu tari wan di tiyir. Xabe fayik Picquart ke Levcenkasa Zaniga va malyerotafa roklara fu kosmar ise va rolaca glotcayana gan Henry redakik ta anzara va Dreyfus di basitalar. Xabe bantan div Guyana bak 1899 zo dimstar aze koe Rennes zo malyer nume gan Loubet taneagadesik zo grigaker abdida bak 1906 di zo dimrokar...

Bat sugdalaruyus evodas gretcaks to wan krulder.

Kevaxasa va stiruca ke sayakaf delmik, trituca is vurkuca ke lanzanik va « inaf iskars dem liduca » goremstayad. Soe va ronkuca ke malyerot kev kerujuca ke lanaceem is abdimalyekseem direkeon di lecayar.